ഫിഡെ വനിതാ ചെസ് ലോകകപ്പിന്റെ സെമിഫൈനലിലേക്ക് മുന്നേറി ഇന്ത്യയുടെ സൂപ്പര്‍ താരം കൊനേരു ഹംപി. വനിതാ ലോകകപ്പിന്റെ സെമിഫൈനലിലെത്തുന്ന ആദ്യ ഇന്ത്യന്‍ വനിതാ താരമെന്ന നേട്ടം ഇതോടെ കൊനെരു ഹംപി സ്വന്തമാക്കി. ക്വാര്‍ട്ടറില്‍ ചൈനയുടെ യുസിന്‍ സോങ്ങിനെതിരെ സമനില നേടിയാണ് താരത്തിന്റെ മുന്നേറ്റം. ചൈനീസ് താരത്തിനെതിരായ ക്ലാസിക് പോരാട്ടത്തിന്റെ ആദ്യഗെയിമില്‍ ഹംപി വിജയിച്ചിരുന്നു. രണ്ടാം മത്സരത്തില്‍ സമനില നേടിയതോടെയാണ് താരം സെമിഫൈനലിലെത്തിയത്.
അതേസമയം ഇന്ത്യയുടെ മറ്റ് രണ്ട് താരങ്ങളായ ദ്രോണാവാലി ഹരികയും ദിവ്യ ദേശ്മുഖും ക്വാര്‍ട്ടറിലുണ്ട്. ഇരുവരും പരസ്പരം ഏറ്റുമുട്ടും. അതിനാല്‍ തന്നെ സെമി ഫൈനലില്‍ ഹംപിയെ കൂടാതെ മറ്റൊരു ഇന്ത്യന്‍ താരം കൂടി സെമി ഫൈനല്‍ കളിക്കുമെന്ന് ഉറപ്പായി. ഫൈനലില്‍ ഇന്ത്യന്‍ താരങ്ങള്‍ മുഖാമുഖം വരുന്ന സാഹചര്യമുണ്ടായാല്‍ 2 മെഡലുകള്‍ സ്വന്തമാക്കാന്‍ ഇന്ത്യയ്ക്ക് അവസരമൊരുങ്ങും.
