മലയാള സിനിമയിലൂടെയാണ് അരങ്ങേറിയതെങ്കിലും തെലുങ്ക് സിനിമയില്‍ സൂപ്പര്‍ താരപദവിയിലേക്കുയര്‍ന്ന നായികയാണ് സായ് പല്ലവി. മലയാളം,തമിഴ്, തെലുങ്ക് സിനിമകളില്‍ സ്ഥിരസാന്നിധ്യമാണെങ്കിലും സായ് പല്ലവിയെ രണ്ട് കയ്യും നീട്ടി സ്വീകരിച്ചത് തെലുങ്ക് സിനിമയാണ്. ഗ്ലാമര്‍ വേഷങ്ങള്‍ ചെയ്യാതെ തന്നെ തെലുങ്കില്‍ തന്റേതായ സ്ഥാനം നേടിയെടുത്ത സായ് പല്ലവിയ്ക്കാണ് കഴിഞ്ഞ വര്‍ഷം ദേശീയ പുരസ്‌കാരത്തിനായി ഏറ്റവുമധികം സാധ്യത കല്‍പ്പിച്ചിരുന്നത്.
എന്നാല്‍ അവസാന നിമിഷം തിരുച്ചിത്രമ്പലം എന്ന സിനിമയിലെ പ്രകടനത്തിന് നിത്യ മേനോനായിരുന്നു പുരസ്‌കാരം. ഇപ്പോഴിതാ താന്‍ എല്ലായ്‌പ്പോഴും ദേശീയ പുരസ്‌കാരം നേടാന്‍ ആഗ്രഹിച്ചിരുന്നതായി വെളിപ്പെടുത്തിയിരിക്കുകയാണ് സായ് പല്ലവി. അതിന് പക്ഷേ സായ് പല്ലവി പറയുന്ന കാരണം ലേശം വ്യത്യസ്തമാണ്.
എനിക്ക് 21 വയസുള്ളപ്പോള്‍ മുത്തശ്ശി ഒരു സാരി സമ്മാനിച്ചിരുന്നു. കല്യാണത്തിന് ധരിച്ചോളു എന്ന് പറഞ്ഞാണ് എനിക്ക് തന്നത്. ആ സമയത്ത് അവര്‍ രോഗം മൂര്‍ച്ഛിച്ചതിനെ തുടര്‍ന്ന് ശസ്ത്രക്രിയയ്ക്ക് വിധേയയായിരുന്നു. അന്ന് ഞാന്‍ എന്റെ ആദ്യ സിനിമ പോലും ചെയ്തിരുന്നില്ല. 24 വയസിനോട് അടുക്കുമ്പോഴാണ് പ്രേമത്തില്‍ അഭിനയിക്കുന്നത്. മുത്തശ്ശി സമ്മാനിച്ച സാരി ഏതെങ്കിലും വലിയ അവാര്‍ഡ് ലഭിക്കുമ്പോള്‍ ധരിക്കാമെന്നാണ് കരുതുന്നത്. അതിനായി ദേശീയ പുരസ്‌കാരം വേണമെന്ന് ആഗ്രഹിച്ചിരുന്നു. സായ് പല്ലവി പറഞ്ഞു.
