ഫിഫ ക്ലബ് ലോകകപ്പില്‍ യൂറോപ്യന്‍ ചാമ്പ്യന്മാരായ പാരീസ് സെയ്ന്റ് ജര്‍മനെതിരെ എതിരില്ലാത്ത നാലു ഗോളുകളുടെ പരാജയം ഏറ്റുവാങ്ങി മെസ്സിയുടെ ഇന്റര്‍ മയാമി. വ്യക്തിപരമായി മികച്ച നില നീക്കങ്ങള്‍ നടത്താനും ചാന്‍സുകള്‍ ക്രിയേറ്റ് ചെയ്യാനും മെസ്സിക്കായെങ്കിലും ടീമിന്റെ മൊത്തത്തിലുള്ള പ്രകടനം നിരാശാജനകമായിരുന്നു. ആക്രമണത്തിലും പ്രതിരോധത്തിലുമെല്ലാം വ്യക്തമായ മേധാവിത്വമാണ് പിഎസ്ജി മത്സരത്തില്‍ പുലര്‍ത്തിയത്. ഇന്റര്‍മയാമിയുടെ പരാജയത്തിന് പിന്നാലെ മെസ്സിയുടെ പ്രകടനത്തിനെതിരെ ഉയര്‍ന്ന വിമര്‍ശനങ്ങള്‍ക്ക് മറുപടി നല്‍കിയിരിക്കുകയാണ് മുന്‍ സ്വീഡിഷ് താരവും ബാഴ്‌സലോണയില്‍ മെസ്സിയുടെ സഹതാരവുമായിരുന്ന സ്ലാട്ടന്‍ ഇബ്രാഹിമോവിച്ച്.
ഫ്രാന്‍സിലെ പ്രശസ്ത ഫുട്‌ബോള്‍ മീഡിയയായ ഫുട് മെര്‍ക്കാട്ടോയോട് സംസാരിക്കവെയാണ് ഇബ്രാഹിമോവിച്ച് പ്രതികരിച്ചത്. മെസ്സി തോറ്റെന്നോ?, ഇല്ല തോറ്റത് ഇന്റര്‍ മയാമിയാണ്. മെസ്സിയല്ല. നിങ്ങള്‍ കളി കണ്ടോ?, പിഎസ്ജി കളിച്ചത് മെസ്സിക്കും 10 പ്രതിമകള്‍ക്കും എതിരെയാണ്. പിഎസ്ജിയില്‍ മാഞ്ചസ്റ്ററില്‍ മറ്റേതെങ്കിലും ഒരു ക്ലബിലായിരുന്നെങ്കില്‍ കളി വ്യത്യസ്തമായേനെ. കളിയോടുള്ള സ്‌നേഹം മാത്രമാണ് മെസ്സിയെ ഗ്രൗണ്ടിലെത്തിക്കുന്നത്. വലിയ ഒരു വിഭാഗം കളിക്കാര്‍ക്ക് സാധിക്കാത്തത് മെസ്സിക്ക് ഈ പ്രായത്തിലും കഴിയുന്നു. ഇന്റര്‍ മയാമിയില്‍ പരിശീലകരില്ല. താരങ്ങളില്ല. പന്തില്ലാതെയും എങ്ങനെ കളിക്കണമെന്ന് അറിയുന്നവരില്ല. നിങ്ങള്‍ക്ക് മെസ്സിയെ കുറ്റപ്പെടുത്തണോ?, അവനെ ഒരു യഥാര്‍ഥ ടീമില്‍ ഇടുക. വീണ്ടും സ്റ്റേഡിയം കത്തിച്ച് കളയാന്‍ മെസ്സിക്ക് കഴിയും. കാരണം മെസ്സി പഴയ മെസ്സി തന്നെയാണ്. ഇന്നത്തെ തോല്‍വി അവന്റെയല്ല. ഇന്റര്‍ മയാമിയുടേതാണ്. സ്ലാട്ടന്‍ വ്യക്തമാക്കി
