ജീവിതം രസകരമായി മുന്നോട്ടുപോകുകയാണെങ്കില്‍ കുഴപ്പമില്ല. ഒരേ ദിനചര്യയും കാര്യങ്ങളുമായി ലൈഫ് ബോറടിയാണെങ്കില്‍ എന്തുചെയ്യും? എന്തെങ്കിലും പുതുമയുള്ള കാര്യങ്ങള്‍ ചെയ്യാനുള്ള തോന്നല്‍ ഉണ്ടാവും എന്നത് സ്വാഭാവികമാണ്.
പ്രണയബദ്ധരായ ഒരു യുവാവും യുവതിയും ഇതുപോലെ തങ്ങളുടെ ജീവിതം ബോറടിച്ചുതുടങ്ങിയപ്പോള്‍ ഒരു സാഹസം ചെയ്തു. വെറുതെ രണ്ടുപേരും ഡി എന്‍ എ ടെസ്റ്റ് ചെയ്തു. രണ്ടുപേരുടെയും കുടുംബത്തിന്‍റെ ചരിത്രവും താവഴികളും കൂടുതല്‍ മനസിലാക്കുകയായിരുന്നു ലക്‍ഷ്യം. 27കാരനായ യുവാവും 26കാരിയായ യുവതിയും എന്തായാലും വെറുതെയൊരു രസത്തിന് ചെയ്ത കാര്യം പക്ഷേ പിന്നീട് വളരെ സീരിയസായി.
യുവാവിന്‍റെ പൂര്‍വികരില്‍ ഒരാള്‍ സീരിയല്‍ കില്ലറായിരുന്നു എന്ന കണ്ടെത്തലാണ് പ്രശ്നത്തിന് വഴിവച്ചത്. ഒരുപാടുപേരെ അതിക്രൂരമായി കൊലപ്പെടുത്തിയിട്ടുള്ള ഒരാള്‍ തന്‍റെ മുതുമുത്തച്ഛനായിരുന്നു എന്ന സത്യം അറിഞ്ഞതോടെ യുവാവ് നടുങ്ങി. എന്നാല്‍ യുവതിക്കാണ് ഇത് കൂടുതല്‍ പ്രശ്നമായത്.
ഒരു പരമ്പരക്കൊലയാളിയുടെ കുടുംബത്തില്‍ പെട്ടയാളുമായി തനിക്ക് സമാധാനത്തോടെ എങ്ങനെ ജീവിക്കാന്‍ കഴിയുമെന്ന ആശങ്കയാണ് യുവതിയെ മദിച്ചത്. ഫലമോ? അധികം വൈകാതെ തന്നെ യുവതി യുവാവിനെ ഉപേക്ഷിച്ചുപോയി!
“എന്നോട് വലിയ സ്നേഹമുണ്ടെങ്കിലും ഒരു സീരിയല്‍ കില്ലറിന്‍റെ ബന്ധു എന്ന സത്യം തന്നെ അലട്ടിക്കൊണ്ടിരിക്കുമെന്നാണ് അവള്‍ എന്നോട് പറഞ്ഞത്. ഒരു കൊലപാതകിയുടെ അതേ രക്തത്തിലുള്ള ഞാനുമായി ബന്ധം തുടരാന്‍ താല്‍പ്പര്യമില്ലെന്നാണ് അവളുടെ നിലപാട്” - യുവാവ് പറയുന്നു.
