Dilsha and Big Boss Malayalam: ആ നടൻ ബിഗ് ബോസിൽ വന്നാൽ അടിപൊളി ആയിരിക്കും, ഫുൾ എപ്പിസോഡും പൊളിക്കും: ദിൽഷ

ബി​ഗ് ബോസിൽ കാണാൻ ആ​ഗ്രഹമുള്ള മത്സരാർത്ഥി ആരാണെന്നും പറഞ്ഞിരിക്കുകയാണ് സീസൺ 4 വിജയി ദിൽഷ പ്രസന്നൻ.

ബി​ഗ് ബോസ് മലയാളം സീസൺ 7 ആരംഭിക്കാൻ പോകുകയാണ്. അടുത്തിടെയാണ് പ്രഖ്യാപനം നടന്നത്. പുറത്തുവരുന്ന പ്രൊമോഷനുകളെല്ലാം സോഷ്യൽ മീഡിയകളിൽ വൈറലായി. ആരൊക്കെയാകും ഷോയിൽ ഇത്തവണ മാറ്റുരയ്ക്കുക എന്ന പ്രെഡിക്ഷൻ ലിസ്റ്റുകളും വന്നുകൊണ്ടിരിക്കുകയാണ്.

ഇപ്പോഴിതാ പുതിയ മത്സരാർത്ഥികൾക്കുള്ള ഉപദേശവും ഒപ്പം തനിക്ക് ബി​ഗ് ബോസിൽ കാണാൻ ആ​ഗ്രഹമുള്ള മത്സരാർത്ഥി ആരാണെന്നും പറഞ്ഞിരിക്കുകയാണ് സീസൺ 4 വിജയി ദിൽഷ പ്രസന്നൻ. 

'കേരളത്തിലെ ഏറ്റവും വലിയ റിയാലിറ്റി ഷോയാണ് ബി​ഗ് ബോസ്. ഒരുപാട് ഒരുപാട് കാഴ്ചക്കാരുണ്ട്. ബി​ഗ് ബോസ് ഇഷ്ടപ്പെടുന്ന ഒരുപാട് ആളുകളുണ്ട്. പുതിയ മത്സരാർത്ഥികൾ എല്ലാവരും നന്നായി പെർഫോം ചെയ്യുക. ഇതൊരു ​ഗെയിം ആണല്ലോ. ആ രീതിയിൽ തന്നെ കണ്ട് മുന്നോട്ട് പോകണം. വ്യക്തിപരമായി വലിയ തയ്യാറെടുപ്പുകളൊന്നും ഇല്ലാതെയാണ് ഞാൻ ബി​ഗ് ബോസിൽ പോയത്. 

പക്ഷേ തയ്യാറെടുപ്പുകളോടെ വരുന്ന ആളുകളും ഉണ്ട്. തയ്യാറെടുപ്പുകളൊന്നും ഇല്ലാതെ പോയി എക്സ്പീരിയൻസ് ചെയ്യണമെന്നാണെങ്കിൽ അങ്ങനെ പോകാം. അല്ലെങ്കിൽ പ്രിപ്പറേഷൻസ് എടുത്ത് 100 ദിവസം എങ്ങനെ നിൽക്കാം എന്ന് മനസിലാക്കി പോകാം. എനിക്ക് അറിയുന്ന ചിലരൊക്കെ ബി​ഗ് ബോസിൽ നിന്നും വിളി വന്നിട്ടുണ്ടെന്ന് പറഞ്ഞിരുന്നു. ആരാണെന്നൊന്നും പറയുന്നില്ല. എങ്ങനെ ഉണ്ടായിരുന്നു എക്സ്പീരിയൻസ് എന്നൊക്കെ ചോദിച്ചിട്ടുണ്ട്. 

എങ്ങനെ നിക്കണം എന്നൊക്കെ. ഞങ്ങളുടെ സീസൺ പോലെ ആകില്ലല്ലോ. എങ്ങനെയാണോ പുതിയ സീസൺ പോകുന്നത് ആ രീതിയ്ക്ക് അനുസരിച്ച് പോകുക എന്നെ ഞാൻ പറഞ്ഞിട്ടുള്ളൂ. ധ്യാൻ ചേട്ടൻ ബി​ഗ് ബോസിൽ വരണമെന്ന് എനിക്ക് ആ​ഗ്രഹമുണ്ട്. എല്ലാ എപ്പിസോഡുകളും നല്ല അടിപൊളിയായിരിക്കും. ഫുൾ കോമഡി ആയിരിക്കും. 100 ദിവസം ധ്യാൻ ചേട്ടൻ ആ വീട്ടിൽ നിൽക്കുന്നതെന്ന് എനിക്കൊന്ന് അറിയണം. അലൻ ജോസ് പെരേര വരട്ടെ. ആറാട്ടണ്ണൻ വരട്ടെ. എന്റർടെയ്ൻമെന്റ് ആണ് ഉദ്ദേശിക്കുന്നതെങ്കിൽ ഇവരൊക്കെ വന്നാൽ നടക്കും', ദിൽഷ പറഞ്ഞു.